昨日幾隻工業股嘅業績都唔錯。經紀黃話，何止表現唔錯，直情就係超過預期。
佢之前提過嘅新確科技（1063），噚日一度質落1.05元，收市報1.16元，跌6.45%，成交股數增至1304萬股，金額1526萬元，嚇到小初以為隻股業績唔對路。
收市後，新確公布中期業績，盈利有成4360萬元，比舊年同期勁升137%，股息亦有成3仙。盤數靚成咁，經紀黃同小初慶幸冇被震走。
另外，近期備受冷落的科技股業績亦強勁，好似ASM太平洋（522）咁，噚日公布截至今年6月底中期業績，盈利6.13億元，比舊年同期勁升221.7%，根本高過晒所有分析員的預測，除咗有中期息45仙外，另有特別股息55仙。
經紀黃話，雖然業績咁掂，但ASM股價仍然冇太大反應，平收27.20元，成交股數111.6萬股，金額3035萬元。原因係芬佬事事向前看，全球都睇淡晶片股前景，雖說ASM業績好掂，但要改變芬佬嘅諗法，似乎唔容易。
慕容小初