立法會選舉報名，各路人馬紛紛吹雞晒馬，造吓勢爭取選票。舊年十一月在區議會輸到趴街嘅民建聯，今次集齊六千友誓師，着晒戲服做大戲，十分之有中國特色。
民建聯新界西候選人譚耀宗率領六男一女扮八仙，大概諗住八仙過海，各顯神通。雖然佢哋位票后陳婉嫻唔知點解失咗蹤，兩次都冇出席黨嘅活動，但阿譚仍然搵到個靚女做何仙姑散吓花，重有俾狗咬嘅呂洞賓，成日吹吓蕭嘅韓湘子，同埋跛咗嘅鐵枴李，不過唔見咗支枴杖。一時間，誓師大會滿天神佛。
呢條橋又幾啱民建聯班選民，起碼好似睇神功戲，冇話聽馬力主席講咩二○一二年可以實現雙普選咁悶。況且上次中央咁關照，派出最高科技嘅神舟五號飛天太空人楊利偉落嚟香港，同同胞打打氣，結果區選都一樣唔老利，搞到曾主席都要引咎辭職，既然科技唔得，不如問吓鬼神，搵元朝明朝嘅道教仙班邪一邪佢，若然八仙過海都唔掂，最多咪田雞過河。
除咗有八仙噱頭，民建聯今次提出個二○一二雙普選目標，亦醒咗好多，識得加番四個冇人能夠確定達到咗未嘅條件，即係釋法權在佢哋手上。認為得，咁就有得普選；未得，咁咪二○一六囉，再唔得就二○二○，一定冇上次在黨綱寫到明爭取二○○七普選咁老襯，第日再轉軚，都冇咁瘀。
講番嫻姐，今次佢夥拍林文輝出戰九龍東，以票后實力要攞一個席位坐定粒六，照計唔使心急去洗樓而唔蘇黨內嘅兄弟姊妹。不過上個禮拜五民建聯場大show，佢同林文輝已經冇到，當時佢嘅前拍檔陳鑑林話嫻姐出咗埠。前日都唔見票后蹤影，睇嚟佢梗係尚未回港，否則冇理由咁冇義氣唔嚟贈吓興，幫阿鑑林拉番幾張飛。
嗱，各位民建聯嘅參選戰友、各位助選團嘅兄弟姊妹，一定要堅信黨嘅參選口號：「穩定為民主、和諧建未來」；重有──過咗海就神仙喇！
傳真︰2623-9278
電郵︰