豪宅地皮有價，帶挈具重建價值嘅舊樓，變得矜貴，業權分散嘅，都可以統一起嚟，組成業主會，全幢放售。好似薄扶林道九十八號福慧苑，一眾小業主清楚全幢放售會較值錢，最終套現瓜分所得，一定比各自出售可觀，於是聯合起嚟，委託置華物業全幢標售，目標價逾億，九月六號截標。
福慧苑由十個業主持有，包括九個單位嘅業主，同埋持有兒童遊樂場部份嘅發展商，十方經過半年磋商，終於達成協議，一致通過全幢標售。相對現時九個單位，每個市值五百餘萬至八百餘萬，合共六千四百幾萬，一齊賣個價明顯高企兼硬淨得多。
福慧苑佔地八千呎，九個單位總樓面逾萬四呎，重建後可增至四萬餘呎，以目標價一億計，每呎樓面價逾二千四。
樓盤示範單位經常人來人往，一般人睇示範單位，都鍾意拉吓啲櫃桶，開吓個廚櫃，所以櫃桶就通常會擺啲假嘢或者乜都冇，不過，恒基地產西灣河嘉亨灣示範單位，就出現像真度極高嘅廚房。
蘭西一如以往咁，入到廚房就上下其手拉開所有廚櫃，立即發現裏面擺滿零食，好似薯片、杯麵同餅乾等等，全部都係真嘢，可以一開即食，絕無花假。好奇之下再開埋雪櫃，一樣糧食充足，重豐富過一般家庭，西瓜、鮮奶、雞蛋同椰青，絕對製作認真，差啲以為自己返咗屋企，可以隨時開餐。
示範單位儲糧充足，真係就算道門壞咗出唔到去，都唔使怕餓親，不過如果啲睇樓客真係一邊睇樓，一邊摷嘢食，售樓處職員都幾唔得閒。
Graffiti可謂街頭藝術創作嘅反斗派代表，可以係惡作劇，亦可以係都市藝術，為刻板嘅石屎森林加一點活力變化。
年紀輕輕嘅ZONO、舊年滑板噴畫大賽優勝者，係Graffiti方面大師級人馬，嚟緊禮拜日，會出席小西灣藍灣廣場蒙馬特創意潮拜大典，聯同多位新出道歌星劉浩龍、鄧肇欣及侯莎莎，即場喺表演台上肆意塗鴉，為整個商場活動揭開序幕。
活動會喺藍灣廣場外海濱長廊舉行，有賣物攤位，售賣二手服飾、自製家品同埋其他潮流玩物。
上周包辦兩單大deal嘅仲量聯行，同蘭西補充資料話，該行前身仲量行，早喺一七八三年由拍賣行做起，一九三九年喺倫敦西區設立辦事處，該區係當今全球寫字樓租用成本最高地區。
仲量行喺二次世界大戰後，接咗唔少倫敦房地產發展、買賣及租賃代理生意，為日後發展打穩基礎。
現任WorldWideRetailExchange行政總裁ColinDyer，九月接任仲量聯行主席，統領全球超過萬七員工，可謂任重道遠。
蘭西
電郵地址：
