財經事務局呢輪真係驛馬星動，人來人往，因為喺同一時間，幾個大員都換人，除咗區璟智執好包袱，接常秘苗學禮個位嘅何鑄明聽講已經到咗位，同老苗交接。
苗學禮呢個高人一個頭嘅老外，喺香港為官幾十年，遇過風風雨雨，都大難不死，可見佢韌力過人，佢同八方講，原來同老婆大人相約好，下年退休後去研習陶瓷藝術，明年十月喺中文大學搞個首次嘅瓷雕展覽，將收藏到嘅珍品公諸同好，你話幾優游。
可惜，佢條命整定有運行兼有錢執，政府忽然預個三年嘅offer畀佢，派佢去日內瓦做香港世貿代表，呢個簡直開正佢強項，於是老苗同太太商量之後，決定答應，下月舉家一齊去做駐外大官，同香港暫別。
苗太真係抵得諗，因為今次一走，苗太要向中大請辭，不再任教。
苗氏夫婦近年愛習華爾茲，上次為記協籌款，曾現場表演，大概今次喺日內瓦，可以大派用場。
傳真︰2623-9278
電郵︰