梁詠琪（GiGi）今日出碟，其中一首新歌《像你》MV搞出唔少是非，因為MV拍攝嘅地方，原來係寰宇公司投資《三岔口》電影嘅場景，寰宇聲明話會採取法律行動追究華納。
華納唱片董事總經理陳志光噚日對寰宇要告華納件事一頭霧水，佢話：「呢隻歌華納只係做發行，製作係由EEI做，喺呢件事上華納冇任何責任。」但《三》片嘅美指張叔平聽到好嬲，佢喺電話度話：「𠵱家部戲冇晒神秘感，真係不知所謂同毫無專業操守，等我同導演睇吓要唔要搭過個景重拍。」
查實呢間件事馮仁昭了解過後，發現係寰宇租個船廠拍戲，喺拍攝合約期滿後，又冇搵人拆景，咁船廠就唔理咁多，照租個地方俾人拍嘢。梁詠琪經理人公司EEI負責人陳小姐噚日回應話：「我哋有租用船廠嘅單據，所以有乜問題都係船廠同寰宇之間嘅事。」
至於寰宇方面，林小明太太噚日就話個廠景係由佢哋公司負責拆除，即使係過咗租借期，都唔可以用佢哋個景嚟拍嘢，佢話華納已經打咗電話同佢講sorry，不過佢都有發律師信畀華納同埋其他有關公司，禁制個MV播出。
公說公有理，婆說婆有理，馮仁昭覺得都係交番專業人士處理。
梅媽噚日發通告畀傳媒，話聽日喺海洋皇宮開記者會，關心一下沙士康復者同家屬。原來梅媽見舊年阿梅搞咗個1:99籌款音樂會，籌到二千萬幫助沙士病者家屬，所以事隔一年後佢都想知道啲錢究竟幫到幾多人。另外，梅媽又話想搞齋宴幫阿梅個四海一心基金籌款，所以咪打算約埋班傳媒一次過搞掂佢囉！
徐子淇同富家公子李家誠嘅戀情最近成為咗城中熱話，日前無綫《娛樂大搜查》就搵咗呢位緋聞女主角做專訪，噚日首集播出。而咁啱得咁蹺，噚晚嘅節目主持就係子淇前度男友洪天明，訪問播完之後，另一主持譚小環就喺節目度鬼馬咁問洪天明前女友條裙靚唔靚？又問徐子淇靚唔靚？搞到洪天明淨係識得笑，鬼咁尷尬。
張震嶽噚日去咗商台做訪問，最近杜德偉喺台灣宣傳新歌《脫掉》嘅時候，唱到除剩條泳褲，張震嶽都試過喺台上除褲，問到佢點睇，他話：「出唱片嘛！沒有甚麼好或是不好，不過我就不會，我覺得音樂好就可以。」佢重話自己只係除過一次褲，但唔知點解次次有人除衫除褲就問佢反應，佢話覺得好頭痛。
