八方一連講咗幾日，話職工盟嘅蔡耀昌俾新界東參選嘅戰友嫌佢形象太「老成」，要同佢改善形象，噚日就有兩位「粉紅救兵」同九哥（蔡耀昌）去新城市廣場逛商店，務求由頭執到落尾。
呢兩位拔刀相助嘅「女俠」原來同九哥識咗好耐，呢次拍心口捱義氣，最後九哥大破慳囊，花咗成三千蚊，由眼鏡、手表到衫褲鞋襪都置過晒新嘅。九哥話，原本戴嘅眼鏡係金屬黑框，「死古古」，新眼鏡係彩色膠框，友人話佢聽，係最「潮」嘅款式，價錢都唔嘢小，要過千。九哥笑言，睇怕呢筆都要計入競選經費，而且唔好期望咁大，只係為自己增加一啲活力而已。不過「靚仔版」九哥要到周末先有得睇，因為重要閉門執下衣物配搭同髮型先。
（圖）蔡耀昌（左）多得身邊兩位「粉紅救兵」打救，幫佢買嘢轉形象。
傳真︰2623-9278
電郵︰