政府財經事務及庫務局發表諮詢文件，檢討遺產稅，唔知有幾多人會感到有興趣。香港每年有三萬六千人左右死亡，過去五年，年年政府收遺產稅十五億一千二百萬，粗略計，每位死者嘅平均遺產稅係四萬二千元，當然有好多死者冇遺產，只有少數死者有好多遺產嘅。遺產數目由七百五十萬元起，開始徵稅，分5%、10%、15%三類，超過一千零五十萬元就要交15%。
私人銀行家經常為客戶處理遺產計劃（EstatePlanning），賓架R就好有經驗。賓架R話：「相信政府之內，對遺產稅計劃嚟講，冇人熟得過馬局長，馬先生以前係我哋行家，一定見過唔少例子。你知啦，我哋叫遺產稅為愚蠢稅（dumbtax），只有唔識搵律師、會計師或私人銀行家做一個遺產計劃嘅笨人，先至會搞到繼承人要交稅。逢係闊佬都設置家庭信託（familytrust），董特首咪有一個囉。離岸公司加家庭信託，台灣富豪幾乎人人有，交乜嘢遺產稅喎！」
唔係個個人都有咁多遺產搞一個家庭信託嘅，賓架R就話：「你冇五六千萬資產交落畀仔女，唔好搵我呀，我哋好貴㗎！」咪係囉，遺產稅唔係由超級富豪、大富豪子女繳交嘅，而係由一啲死慳死抵嘅高級中產人士後人交嘅。呢類人最冇癮，生前交最高嘅薪俸稅，死後交最高嘅遺產稅，直情係政府眼中嘅肥羊。如賓架R話齋，馬局長對遺產稅最清楚，由佢處理遺產稅是否應該廢除嘅問題，不作第二人想。左丁山辛辛苦苦咁日做夜做捱咁多年，從來交稅有早冇遲，梗係反對遺產稅喇，董特首咁多錢，將來都唔會畀，點解要左丁山之流嘅後人交稅呀！