唔好睇NBA嘅「巨無霸」奧尼爾平時儍更更咁，淨係識搞笑同入樽，其實佢做人處事都好識大體，一啲都唔胡塗。
好似佢早排同效力多年嘅湖人隊一刀兩斷，轉咗去邁亞密熱火，呢件事令到唔少洛杉磯球迷好唔開心，甚至有當地嘅電台DJ呼籲球迷，燒咗奧尼爾嘅湖人球衣；又話湖人冇咗奧尼爾重好，總之氣氛都幾僵。但係呢位中鋒唔單止唔嬲，重喺噚日嘅《洛杉磯時報》登咗全版廣告同球迷道別，喺廣告裏面佢自己手持籃球，滿面笑容，話衷心感謝洛杉磯擁躉多年嚟嘅支持。呢啲說話真係幾warm，洛杉磯嘅球迷受唔受落就唔知，但我求驗客相信點都會平息一啲怒氣。
其實邊度會有不散嘅筵席呢？最難得係奧尼爾識得「以德報怨」，唔會作出反駁爭拗，費事火上加油。呢啲咁圓滑嘅手腕先至高明，畢竟山水有相逢，邊個敢保證奧尼爾有朝一日唔會返轉頭，做湖人嘅管理層啫！
新球季要喺英甲聯角逐嘅列斯，日前同到訪嘅西甲冠軍華倫西亞友賽打和二比二。最難得嘅係列斯喺培訓新人上有一手，之前出咗個米拿，跟住就艾朗連儂，最近就有華頓。華頓更喺對華倫時有入球，可惜勇戰受傷。不過，列斯領隊布力維就話唔怕，因為球隊新人多的是。
大家重記唔記得鶴臣呢？佢都算係歐洲著名嘅教練，曾帶領過國際米蘭、布力般同埋烏甸尼斯等球隊，重以戰略厲害見稱。近年佢際遇麻麻，啱啱成為咗挪威超級聯賽隊維京嘅教練，點知喺星期一第一次帶隊出師，維京就俾利尼史特朗大炒五比一，連鶴臣自己都話冇癮。
英超聯球隊米杜士堡今夏動作多多，已先後簽咗維杜卡、哈索賓基、列斯加同埋柏奴亞四名球員；不過，佢哋嘅行政總監林比就好大口氣咁話，將會喺呢個星期，重好可能有新球員加盟。我求大俠真係好服米杜士堡，想知道佢哋點解可以財來咁有方，簽咁多有名氣嘅球員。
喺○三至○四球季結束後，唔少效力巴塞隆拿嘅荷蘭球員獲准自由轉會，前鋒古華特、中場高古及後衞列斯都已落腳，偏偏喺今屆歐洲國家盃表現重好搶鏡嘅翼鋒奧華馬斯，就話因為膝頭嘅長期傷患，所以決定掛靴。小飛俠其實只有三十一歲，我求大俠就替佢感到好可惜。