經紀黃上周話過，德永佳（321）雖然盈利倒退，但芬佬並冇離棄，皆因隻股最壞時候已經過去。結果隻股公布業績，盈利倒退28.5%至4.22億元，但股價仍然有得升，真係可喜可賀。
公布業績後，德永佳管理層同分析員講，原材料棉花價格已經回落，接單情況亦OK，零售生意又比預期中好，派息比率亦唔低。結果真係留住芬佬既心，其他工業股真係要學吓嘢。
德永佳噚日升4.7%，收6.60元，成交股數143萬股，金額938萬元，現水平較唔少分析員嘅目標價，仍有不俗上升空間，可以買些少。
另外，經紀陳提及的智庫科技（8153），噚日突然開車，大升11%，收1.90元，成交股數急增至567萬股，金額993萬元。
小初即刻問經紀陳係咪有其他新料？經紀陳話，智庫今日開記者招待會，廣邀證券界中人，推介新買入的湖南數碼電視平台業務，可能有人預先收到風，偷步炒上而已。
慕容小初