立法會剛開始接受提名，有「飛天朱」之稱嘅朱幼麟就突然高調話唔參選，真係令人莫名其妙，唔通參選都冇自由？
八方於是四處打探，老朱為人醒目，明知今年冇咗選舉委員會嘅小圈子渠道，幾個月前開始部署好喺新東出直選，重喺大埔成立埋辦事處。
老朱對於自己好有信心，因為每次民調都有百分之四嘅支持度，一個唔該協調成功，都有機會攞一個議席，聽講問題就出喺呢度。
飛天朱點出位，佢都係港進聯嘅成員，要聽負責去講數嘅主席劉漢銓話，而眾所周知，劉主席又要聽中聯辦話，加上劉主席連自己都冇掟落腳，你點可以靠佢去傾。
結果飛天朱就萬事俱備，班大佬忽然唔受佢玩，你話幾傷佢心，有人話佢星期六見過田少，唔知係咪傾組一張名單；又有人話一切都係星期日上午發生，老朱中午飛返大陸見朋友散心，同時宣布不參選。睇怕都係時候劉主席要出嚟交代吓，個黨除咗馮志堅有得報吓名之外，其餘人等係咪都收檔喇。
（圖）朱幼麟對選舉萬事俱備，但突然唔受佢玩，真係傷佢心。
傳真︰2623-9278
電郵︰