港股噚日個勢，出乎意料之外咁硬淨。早段市況雖一度大跌134點，但低位有承接力，見到買盤好有秩序地慢慢吸納，結果恒指就逐步升番上高收，雖然都係跌，但只係跌33點，對一眾好友而言，真係還得神落！
相對外圍市況，港股個市底真係好強，大戶好明顯係累積緊好倉，聽講8月份，佢哋會大舉出擊。至於未來兩三日，由於期指結算關係，市勢重可能會有少少反覆，但結算過後，走勢將會明朗化，升破6月中高位12539，初步目標指向13500。未來幾個月，市況會反覆造好，有機會升到11月。
大市雖調整，地產股就真係好強勢，噚日走出信置（083），高收4.95元，升3.6%；長實（001）則由低位58.5元升番上59.5元，冇跌到，至於新地（016）同新世界（017），逆市而升一個位。
本港6月份通縮0.1%，但用作計算嘅租金只係去年下半年嘅數字；過去半年，租金已由低位逐步回升，實際上，香港應已走出通縮期，近日地產股轉強，與此有關。美聯（1200）就預期下半年物業成交量會逐步回升，而樓價每年會平均有15%的升幅。筆者3隻心水地產股，長實目標64元、新地70元、新世界8元。
今次大市由低位回升，兩隻大藍籌股，滙控（005）完全冇郁過，中移動（941）亦只係有小小反應。大市若一如所料，破位而上，滙控同中移動肯定會擔當重要角色。
過去4個月，中移動走勢形成大型複式頭肩底，頸線24元，股價近日由低位回升，已重上3條平均線之上，升破頸線阻力，量度上升目標28.5元，即係重遊今年3月的高位。
中移動仍係內地流動電話市場的領導者，6月份新增客戶就有271萬名，按月增長1.65%，令總用戶上升到1.59億戶。大行都看好中移動前景，里昂就指中移動會在中期業績報告時暗示增加派息比率，維持其「優於大市」評級，目標價28.5元。
滙豐證券指中移動新收購的10省網絡，明年開始有較大貢獻，每股盈利可達2.18元人民幣，因此把評級由「持有」調升至「增持」，目標價亦調升至27元。
郭兆誠