外圍唔掂，港股果然冇好運行，好彩亦唔使行衰運。恒指昨日早段跌過134點，但有人頂住，慢慢買番上去，結果恒指全日只係微跌33點，睇嚟大戶似係好倉底。
國企指數亦係先挫後穩，早段一度插低96點，尾市跌幅收窄，雖然收市仍跌47點，但以全日高位4301報收，國企股有望初步企穩。
重磅國企中石油（857）走勢一樣係先低後高，最低落過3.775元，收報3.85元，跌1格，但以最高價收市，短線有機會向上發展，相關Call輪值得動吓腦筋。
穩陣派玩中石油Call輪，9343最適合。呢件12月15日到期，大把日子，現價70仙，溢價只係0.8%，槓桿率係細啲，得5.5倍。槓桿唔大其實亦有好處，輸起嚟冇咁傷也。
想博啲，9851比較啱玩，11月中屆滿，溢價5.1%，槓桿率10.6倍。再想博啲，可以考慮9839，玩到10月4日，溢價4.6%，槓桿率17.1%，成交夠，啱炒出炒入。
地產股依然有勢，信置（083）彈高3.7%，收報4.95元。唯一掛牌嗰件信置Call輪9322，跟正股彈升12%，收報83仙，升輪榜上排名第4。9322去到11月尾屆滿，溢價5.7%，槓桿6倍，數據唔離譜，但弊在成交疏，昨日易手貨總值僅過8萬銀，而且買賣差價唔貼，即買即掟，亦隨時要輸幾格。
章盛