美股上周五表現偏軟，本港持續有資金流出，期指周四結算，淡友噚日早段發難，將恒指質低134點，低見12218，不過沽盤唔算多，午後跌幅收窄至33點，收報12319，全日成交只得79億元。黑客話，期指好友似是保留實力，留待周三或周四才出擊，將大市托上。
炒中資股怕宏調，炒銀行股同地產股則怕加息，兼嫌獲利水位唔多，而炒三四線股又怕買正爆煲股，在缺乏其他更好的選擇下，資金仍專注追捧受惠於自由行與通脹重臨的零售股，其中利信達（738）升21%；寶光（084）升20%；慕詩（130）升19%；漢登（448）升18%；威高（1173）升14%。堡獅龍（592）雖被主席羅家聖減持，但股價一樣勁升11.5%，收2.675元。
中電信（728）近期成交大增，噚日股價偏軟，跌0.95%，收2.60元，成交達1.9億元。不過，摩根大通入市接貨，增持2113萬股，平均每股高達2.70元。Cookie話，連摩根大通都增持，中電信可能有動作跟尾。現時國內電信行業醞釀大改革，一時「四併二」，一時又話「六併三」，最新又好似話唔使併，可能又有新方案出台，總之消息立立亂，唔知係好事定壞事。
中糧國際（506）噚日一度被質至3.075元，跌幅高達9.5%，最後收窄至5.9%，收報3.20元，成交4583萬元。公司大約會在8月中公布業績，有傳聞話因期內先後受到禽流感及原材料漲價等不利因素打擊，業績將錄得倒退。噚日沽壓咁大，唔通係春江鴨沽貨？
阿虎