花絮

紅毛球迷=最佳第6人
香港隊順利衞冕工商盃，除咗球員努力，主隊球迷支持亦功不可沒，特別呢位戴上紅假髮（圖一），面上塗上區徽嘅男球迷，每次美國福建精英隊射罰球，坐喺籃框後排嘅佢都落地揮舞打氣棒圖干擾對手，港隊「最佳第六人」非佢莫屬啦。

「廣告天王」想打NBA
今場入十分嘅12號仔官秀昌（圖二），相信喺最令球迷留下深刻嘅美國福建精英球員，事關佢身材同打法都酷似香港插花王香振強，而且重喺上年NIKEBattleground廣告嘅主角。原來官秀昌生於澳門，一歲時舉家移民美國洛杉磯，正讀緊加州Occidental大學四年級，亦代表校隊參加NCAA比賽，佢重好信心爆棚話未來打到NBA㖭。

徐嘉諾主持頒獎真識做
賽會噚日邀請資深籃球評述員徐嘉諾做頒獎禮主持，佢就十分識做，叫香港隊隊員一人攞一支贊助比賽嘅蒸餾水出場，當然𠱁得贊助商鬼咁開心。不過頒獎時，嘉諾就唔多清楚點解由翁金驊攞盃，只話驊仔資歷最老，其實驊仔係香港隊隊長，理所當然由佢捧盃。