意大利靚女莫妮卡貝露絲（MonicaBellucci）由《非常公寓》到《西西里的美麗傳說》，已經公認係「麻甩尤物」，雖然佢喺《22世紀殺人網絡２決戰未來》入面只係一個大花瓶，但原來佢經常反思生活，更懂得利用自己身體對社會作出控訴，絕對唔係空有美貌同身材。
現已腹大便便嘅莫妮卡，最近為新一期時裝雜誌《VanityFair》拍攝封面，而呢次重係佢第一次大住肚拍裸照。不過，莫妮卡今次係出師有名，佢以懷孕裸體去抗議意大利對懷孕而立嘅新法例，可謂意義重大。
意大利最近通過新法例，只有夫婦可進行試管嬰兒手術，又禁止捐精。莫妮卡覺得呢啲法例好荒謬，佢話：「宗教同道德規範已經掩蓋咗常理，呢啲咁嘅法律其實係間接剝削咗未婚女性借助科學去生育嘅權利。」
思想開放嘅莫妮卡亦解釋佢要做媽咪嘅原因，佢話：「我已經厭倦我嘅身材，覺得自己嘅身形自十八歲後完全冇變過係件好荒謬嘅事，我明白我嘅乳房唔係要嚟填滿件晚裝，𠵱家係時候畀佢實踐佢嘅實際作用！」