一名投資者「上屋換下屋」，足足慳番七十六萬，易手嘅單位重賺咗近二百萬，認真好數口。
中原地產高級分行經理歐陽振邦表示，呢名投資者舊年用三百五十萬七，買入長沙灣宇晴軒五座高層C及D室相連戶，面積一二九一呎，早前以五二六萬沽出單位，賺咗一百七十五萬三。
唔夠一個禮拜，佢再用四百五十萬，買入同座低幾層C及D室相連戶，呎價三四八六元，低市價逾一成。兩單位景觀差唔多，價錢就差成七十六萬，若佢第日將單位出租，租金回報率重相對高唔少。唔知接佢貨嘅買家，有冇後悔早咗入市呢？
蘭西睇中原網頁，發覺宇晴軒二手成交都好活躍，但相連戶買賣就好罕見。
上周大額投資頻現，仲量聯行都算威威，幫完老牌建築商邱南記以二億六千萬元沽出中環靚舖，又替捷成洋行以一億二千七百八十萬，售出觀塘海濱道一八一號工業地盤。
此標本由另一家物業顧問行處理，但截標前已經成交，仲量聯行港區董事古嘉豪話，買家會興建寫字樓，作為轄下生產業務嘅香港總部，地盤可建樓面約三十萬九千呎，每呎樓面地價約四一四元。
蘭西記得由仲量聯行標售嘅觀塘安建大廈全幢已截標，未知幾時有消息公布。
本港承建商起樓，開始廣泛應用預製模件，好似市建局同新世界合作嘅西環堅尼地城重建項目，就係利用預製模件起樓，平均五日可以起一層，包括埋外牆、樓梯、露台同有關部份。
新加坡建屋發展局對呢項技術好感興趣，最近由營建技術處處長帶同部門專業人員來港，實地參觀。聽講今次已經係該局第二次參觀呢個項目。
恒基地產營業部總經理張炳強近期曝光率十分之高，皆因集團嘅重頭項目西灣河嘉亨灣，就快賣，為催谷個盤，佢今日重要走足四場，認真唔得閒。
上晝十一點第一場係利嘉閣誓師大會，一個鐘頭後就輪到中原搞誓師；之後就要急急腳為嘉亨灣示範單位開放搞記者會同午宴。食完飯又要出席美聯同港置嘅聯合誓師大會。咁多個活動都同嘉亨灣有關，個盤想唔見報都幾難嘞。
嘉亨灣上個禮拜足足搞咗五日記者會，睇嚟今個禮拜同傳媒見面嘅日子都唔少得過上周。
噚日禮拜日，張炳強都要出動，帶記者坐直升機，從高空俯瞰，喺另一個角度睇吓嘉亨灣。不過，分身乏術嘅張炳強，唔能夠陪同記者喺直升機上睇樓，影完相講咗兩句就匆忙走人，唔知係咪要準備今日首度開放示範單位嘅大日子。不過，記者影咗啲鳥瞰相（圖三），第一時間畀讀者睇吓。
蘭西
電郵地址：
