都市人工作繁忙，經常做到頸梗膊痛，所以攬枕、腰墊和頸枕就愈來愈受歡迎。新款除追求外形的設計外，更在質料上求突破。既有中藥價值的蕎麥、舒服的雪豆，更有加入電動按摩功能的設計。務求維持你的正確坐姿之餘，也可以消除疲勞，保持健康。
記者：張穎麟
攝影：伍慶泉、陳智良
Model：Don
舒服具功能
今時今日的功能頸枕、腰墊、攬枕，具有按摩、除臭、減肥的功能固然吸引，但更重要是大部份產品都有維持正確坐姿的功效。不但可減少肌肉的疲勞耗損，而且更可鞏固骨骼，減少因坐姿錯誤而令骨骼變形的機會。
呢款Sinomax的U形頸枕，唔單止擁有防霉、防蟎蟲和抗菌功能，其枕套更可以拆出來清洗，夠晒方便。它更具有矯正頭、頸姿勢，從而令肌肉放鬆的功效。
原價：$276 特價：$138（c）
雅芳婷旅行頸枕，搭飛機抑或坐長途車都啱用。採用棉質代替一般的吹氣設計，能夠給予用家更足夠的承托。整個頸枕的弧度都是根據人體頸部而設計，就算長時間使用，也可令你維持正確姿勢。
原價：$150 特價：$80（c）
Sinomax零壓力健康頸枕，採用蕎麥做質料，更加入太空棉作混合質料，能產生回彈效果，可因應不同的骨骼結構而作出調整，更有效紓緩頸部疲勞。
原價：$129 特價：$99.9（c）
為了減輕長時間坐下時背、腰及臀部所承受的壓力，呢款太空零壓力腰坐墊，便採用分段式設計來令壓力分散，以及可調高背墊和調校坐墊長度來令人坐得更舒服。值得留意係坐墊特有的U形窩位設計，可令患有痔瘡的朋友更加舒適，夠晒體貼。
原價：$436 售價：$188（d）
由於大部份頸枕都是以綁帶形式固定，所以當椅背太闊時便無從入手。為解決此問題，呢個頸枕就利用一個小沙包作平衡，方便掛在椅背使用，背部、腰位一樣用得。佢更可以根據你釋放的體溫，作出更貼身的變形效果。
售價：$168（d）
日本人對炭的使用方法，可說是出神入化。好像呢個高級竹炭攬枕，只要攬住佢就可以產生遠紅外線效果，從而達到促進血液循環，以及安眠的功效。再加上竹炭本身的脫臭特質，攬幾耐都唔會有汗味透出。
售價：$159（a）
Sinomax按摩頸枕，只要4粒AA電就可以作出紓緩肌肉痠痛的震動，將它放在梳化、辦公室座椅皆可。其設計能貼緊頸背位置，當震動時有被按摩的感覺，縛在腰間更有促進血液循環的減肥之效。
原價：$236 特價：$118（c）
近年的頸枕、腰墊除具現代高科技外，更有傳統中藥幫手。好像日本亞蘭草的按摩墊，可作腰墊、坐墊兩用，而且更內藏蕎麥。據《本草綱目》所說：「蕎麥……煉五臟澤穢。皮睡之，能續精神，益力氣。」故有消除疲勞，吸走體內濕氣之效，可說愈坐愈舒服。
售價：$48（d）
搓圓㩒扁無問題
雪豆攬枕近年突圍而出，雪豆其實是經過加工嘅細發泡膠粒，好處是特別柔軟，以泳衣布作為外層質料，具彈性，攬上身形狀多變，感覺好玩。可以將攬枕放入洗衣袋內，然後直接以清水用手清洗，非常方便。
雪豆絕對是今期最流行的質料之一，雖然佢冇蕎麥咁多功能，但卻勝在一粒粒滑嘟嘟好得意。好似呢個雪豆U形頸枕，承托力唔算一流，不過搓圓㩒扁任你話事，放喺頸上時亦能將壓力分散，款式年輕較Trendy。
售價：$45（b）
呢個咕𠱸名為星光粉紅。布料有種閃爍的效果，絕非一般單調藍色的功能攬枕可比，放在梳化上甚為搶眼，適合年輕家庭。
售價：$59（b）
七彩的星形咕𠱸，其雪豆密度較高，所以較為實淨冇咁易變形，抱起來的質感，也較接近純棉。七色彩虹的主色，最適合襯托色彩繽紛的家具和裝修。
售價：$39（b）
咪以為雪豆淨係得正經攬枕，其實佢一樣有可愛動物的款式。呢條帶點反光的海豚，其設計專為小朋友的身軀而設。其身軀及尾部粗幼適中，小朋友抱起來比一般公仔舒服得多。
售價：$79（b）
適合你正面抱住的狗仔攬枕，雪豆配上毛巾布的質料運用夠晒巧妙，平時擺放都可以企直當公仔玩。選用毛巾質料，當你攬住時，都唔會覺得太熱同冇質感，一物兩用慳錢、慳地方。
售價：$79（a）
除功能產品以外，以得意外形作為賣點的頸枕、腰墊同攬枕，亦不得不提。單是看到大口仔可愛的面蛋，便知道一定能討女孩子和小朋友的歡心。而且咪以為佢哋毫無內涵，其實新一代的卡通攬枕，設計都會根據人體弧度作出調整，讓你攬得更舒服。
一睇見呢個火柴人攬枕的抵死外表，就想攬住佢，雖然四肢瘦削毫無質感，不過身軀就大大份好好攬。睇埋佢嘅自傳，原來佢性格單純，對人熱情，最喜愛發光發熱，既夢想做大隻消防員，可惜天生怕水的矛盾性格，便令人想將他一抱入懷。
售價：$168（b）
說到可愛的卡通人物，當然唔可以冇咗小朋友最喜歡的大口仔啦！今次佢化身成可愛坐墊，利用其大口將你的背部好好承托。單看外表可能你會覺得唔好坐，但當你試過就會發現他的啤梨身形，是特意遷就讓你的臀部坐得更舒服，可說是用心良苦。
售價：$129（b）
無可否認，吹氣頸枕無蕎麥和純棉咁舒服，但說到方便卻又無出其右。所以米奇都以吹氣頸枕形式登場，平時放晒氣收納唔阻地方，用時才吹氣使用。旅行或坐長途車有佢相伴，唔怕瞓到頸痛。
售價：$29（e）
咪睇跳跳虎的睡姿和大頭比例有點怪，其實它的設計是為了遷就人體的弧度而設。只要攬住佢條頸，就會發現呢款跳跳虎攬枕好好抱，除了跳跳虎外，還有維尼、豬仔、咿唷可供選擇。
售價：$75（e）
一睇見豬仔變到咁長，就知佢係一條攬枕。值得一讚係選用毛巾布作為攬枕質料，攬落特別爽，炎夏時分都唔怕抱到出汗，攬落軟綿綿，細路女實鍾意。
售價：$69（e）
售賣點：
(a）永安百貨 27106288
(b）西田百貨 26491111
(c）吉之島 28846888
(d）崇光百貨 28338338
(e）Trendyland 27449633