早輪我求大俠咪講過英格蘭國家隊領隊艾歷臣感情生活多姿多采，背住女朋友蘭茜搭上咗英足總行政總監柏利奧斯嘅女秘書艾琳。估唔到呢單嘢重有得跟進，據英國報章報道，三十八歲嘅艾琳對朋友表示，艾歷臣雖然已經五十六歲，但估唔到重好弗，有心有力，搞到艾琳好滿足。最奇嘅係英格蘭足總竟然發表聲明，證實艾琳分別同艾歷臣及柏利奧斯有私情。
另外，風流呢家嘢唔知係咪可以傳染嘅呢？除咗艾歷臣外，佢麾下嘅國腳新星朗尼亦都俾人踢爆喺○二年十二月二十八日背住女朋友高蓮偷食。當時得十七歲嘅朗尼同一個叫做夏綠蒂嘅應召女郎鬼混，事後夏綠蒂話想要啲嘢證明曾經同朗尼風流過，而朗尼就真係笨到同佢簽名，並喺上面寫住：「給夏綠蒂，我喺二十八日同你溫存過，朗尼上。」咁都得？
效力熱刺嘅中場列納都係英超「容易受傷的男人」，由效力利物浦到𠵱家，因大大小小傷患搞到成日缺陣。佢喺呢個夏天就一場熱身賽都冇同熱刺上過陣，唔少人指佢可能又受傷。不過熱刺副領隊曉頓話：「列納係經驗豐富嘅球員，未必需要踢熱身賽嚟谷狀態。」你哋又信唔信？
今屆圖圖盃暫時最爆冷嘅，算係德國勁旅多蒙特前日喺第三圈次回合輸畀比利時嘅亨克一比二，兩回合合計因作客入球優惠而出局。多蒙特出局後，全隊都好失望，因為冇得打歐洲賽，會少咗好多收入。不過，反過嚟睇，佢哋𠵱家可以專攻聯賽，話唔定喺德甲聯開咧時會有好表現呢！
希臘爆冷捧走歐國盃後，好多效力希臘球會嘅國腳都猛傳會被賣走，為球會減債；不過，效力雅典AEK嘅中場卡索蘭尼斯竟同球會續約三年，人工三級跳，加薪至每年四十萬歐元（約三百八十萬港元）。卡索蘭尼斯唔好開心住，雅典AEK負債纍纍，真係收到人工先算啦！
衛冕英超聯冠軍阿仙奴，近排俾法國中場韋拉可能離隊投皇馬單嘢搞到好鬼煩。佢哋嘅荷蘭老將前鋒伯金一於好少理，重叫隊友專心踢好啲波，佢自己重以身作則，繼喺對馬里博爾嘅友賽有入波之後，日前對奧地利格拉茨AK嘅友賽又再次建功助球隊贏二比一，果然老馬有火。