有線娛樂台噚日喺銅鑼灣怡東酒店舉行面試，招募主播同幕後人員，由於只會請三十人，所以競爭相當激烈。唔知係唔係有好多大學畢業生都未搵到工，面試喺朝早九點開始，但晨早六點幾就有人去排隊，全日合共有近千人去面試。
有線電視節目執行董事徐小明話，所有應徵者都要自我介紹同埋考筆試，以及一定要大學畢業，特別要精通「兩文三語」。徐小明慨歎好多大學生嘅國語水準比英文水準差，但係今年面試嘅人比舊年嘅水準平均高啲。
成功被取錄嘅幸運兒，將會接受一連串嘅訓練，如果冇有關工作經驗嘅起薪點會有八至九千蚊。徐小明話：「有唔少男仔都有好突出嘅表現，除咗外形討好之外，亦都唔怯場，其中亦都有現職嘅模特兒嚟面試！」
而喺加拿大讀完美術返港面試嘅王小姐話：「我對娛樂藝術工作好有興趣㗎！」佢喺自我介紹嘅環節力讚自己嘅國語好流利同純正，不過佢嘅廣東話就麻麻。
梁洛施（Isabella）噚日喺銅鑼灣宣傳即將推出嘅細碟，佢扮到成個公主咁，Boy'Z嘅Kenny帶咗籃生果送畀佢，重扮到成個王子咁拖住Isabella合唱。本來房祖名同陳柏霖都嚟撐場，但祖名後來竟然話好攰，柏霖又話有嘢做，所以甩晒底。Kenny近日俾人影到同舊女友當街拖手，佢噚日話自己冇咁大膽，根本冇拖手喎！
梁朝偉嚟緊會接拍由王家衞導演嘅功夫片《葉問傳》，佢喺戲裏面飾演李小龍師傅葉問，所以最近積極運動，做足準備功夫，偉仔日前話：「我已經勤練功夫，也加強運動，例如打乒乓波、羽毛球同滑水等，練習最多嘅係乒乓波，我重特別跟教練學習。」
台灣近日查獲咗幾宗偽造學歷等證件集團後，許純美俾台灣勞委會查獲，話佢涉嫌提供偽造嘅台北榮民總醫院診斷書嚟申請外勞，呢單案已經移送調查局查辦。
而許純美另外又涉嫌積欠外勞工資、強行扣留外勞護照，俾台北市勞工局罰款六萬台幣（約一萬四千港元）。
內地有報章話劉德華會投資一千五百萬，同內地好出名嘅演員趙本山合作，以相聲為題材開套賀歲喜劇，華仔噚日喺電話度話：「我公司嘅電影部余偉國先生負責呢樣嘢，相聲係中國好出名嘅藝術之一，余生對呢個題材好有興趣，佢初步接洽緊，要睇埋劇本先知成唔成事。」余偉國則在電話中說：「我哋好欣賞趙本山，但𠵱家乜都未落實。」
張學友前晚去灣仔會展睇新戲《導盲犬小Q》首映，對於被指買樓𠱁老婆羅美薇，佢話：「老婆要𠱁嘅，觀察佢想食乜囉，最難係呢樣嘢。」
學友笑言囡囡張瑤華近日好想養狗，但佢話要囡囡大個啲先畀佢養，佢話：「畀住假狗佢玩先，再扭計就打佢教佢囉！」
