近日最熱門話題，當然係先科國際（724）事件引發廉署搜查報館呢單大新聞，估唔到呢單case不但影響細價股炒作活動，連傳媒亦受拖累。
講開傳媒，經紀陳話不能不提智庫科技（8153），隻股自從5月公布，向亞視前掌舵人封小平等收購一間湖南數碼網絡系統平台業務後，股價一度彈升，但之後就靜到不得了，最近又舊事重提，傳在近期內有動作。
經紀陳又話，隻股近排活躍咗，有多間經紀行掛牌出出入入，睇落有開車迹象。智庫上周五升4.3%，收1.71元。
話就話智庫有概念可炒，但呢類數碼電視古仔似乎有啲過氣，同其他創業板股相似，智庫街貨好疏落，若然有人想炒作，相信唔係難事，但有冇人跟炒係另外一回事。
另外，查理士．陳一系的股份上周五公布業績，其中保華德祥（498）截至2004年3月底全年業績，由虧轉盈，賺1.64億元，兼夾有末期息1.5仙派。
呢係股份近年相當靜，唔知今次保華德祥業績咁掂，有心人會否借機炒一轉？
慕容小初