大教授到港上任，與校友食飯；佢飲完紅酒，講一段軼事。佢上去大陸演講，有大學生問佢：「讀大學唔畢業，dropout，可唔可以發達？」呢條問題幾刁鑽，大教授答：「Dropout有成功、有失敗，大家都會諗起蓋茨幾巴閉（大家睇吓佢收微軟股息三十四億九千萬美元，就知道佢係星球人），重有SteveJobs（蘋果電腦），與甲骨文（Oracle）嘅老闆。如果個個中途輟學生都咁巴閉，真係唔使讀書，可惜唔係呢！好多好多個失敗者之中，先至有三幾個出類拔萃。如果你哋想創業，不妨讀咗個學位先，當作保險單，一旦創業失敗，都有個學位幫你搵工吖！」
大教授講得有理，我哋問佢在校畢業，是否成績好就會賺得錢多？大教授話：「要做一個長期調查先至知道成績與賺錢嘅關係。史丹福大學做過一次調查，搵十年前MBA畢業生嘅現在薪水分布做研究，同係史丹福優秀學生，點解畢業後十年，有人賺多，有人賺得少？卒之俾研究人員搵到一個事前冇法子諗得到嘅解釋，就係身高最能解釋畢業生嘅收入差異。身高嘅，賺多啲；身矮嘅，賺少啲。呢項發現引起好大討論，因為點解高矮會與收入相關呢？一個解釋係，身高學生，自細到大，都做慣領隊（因為老師通常喜歡搵一個高大學生去帶領矮小學生），久而久之，高佬自信心強，膽敢去衝，容易升職，故此收入高人一等，與佢嘅身高成正比。」
呢項研究，唔知有冇發表過，以後大家睇吓左右隔籬，會唔會有此現象！鄧小平就一定唔啱呢個理論嘞，馮國經、陳祖澤、周松崗、李澤楷都唔算係身高，吳光正、周文耀、任志剛（以香港水平計）就算係幾高嘅。