MP3機唔單止可以聽歌，重可以用嚟襯衫，甚至扮頸鏈。日前韓國MP3廠iriver，於韓國召開發布會，公布將會發售嘅新產品，當中最受矚目首推型號為N10的頸鏈形MP3機，掛上身！分分鐘以為係頸鏈。另外亦展示出流動影院PMP-100實物，最大40GB容量，夠你放十套八套DVD。一眾新機8月就會喺香港開賣，係時候儲定錢喇！
記者、攝影：劉耀祥
支援格式：MPEG3、WMA、ASF
容量：128MB、256MB、512MB
電池：內置鋰電池
播放時間：11小時
功能：錄音、六種EQ模式、3D音效
體積：27.3×62.5×13.4mm
重量：22g
推出日期：8月（售價未定）
近期IT界頻頻將旗下產品結合於時裝之上，不單止手機要玩Fashion，就連MP3機都要玩埋一份，務求將一眾時裝友或潮友襯衫之餘，更要將手機MP3機都襯到絕一絕。
iriver最新產物N10，亦都由此入手，外形設計到似頸鏈多過似MP3機，全黑色機面已經夠晒型，再加上採用OEL顯示器，掛上頸就算唔聽歌都一樣有睇頭。最特別乃機身與頸繩連成一體，繩上更設有耳筒扣，唔聽歌時可將耳筒扣在繩上，唔會邊行街邊吊住咁辛苦。雖然如此設計相當有型，但係用家唔可以換上自己心愛耳筒，好彩原裝耳筒音質亦相當唔錯，低音亦都足夠，對音質有要求的用家相信亦會收貨。
N10重量只有22g，分分鐘比好多真正頸鏈重要輕，而其OEL屏幕熄咗之後，就會變成鏡面，女用家將N10當頸鏈用之餘，更可以當鏡仔用。N10除外形夠潮之外，內涵亦都唔弱，內置有128MB、256MB及512MB三款，最多能夠擺超過100首歌，絕對切合到一般用家需要。支援40種語言介面，當然唔少得繁體中文，中文歌名一樣可以睇到，啱晒香港人。而內置式電池可以連續播放11小時，絕對可列入長氣一族。雖然機身只有62.5mm長，不過亦已經內置USB1.1插位，充電過歌全在此，不得不讚iriver的設計師。
N10主打潮人及時裝人，另一新作iFP-900則走實用路線，外形與前作iFP-500差唔多，不過今次就換上1.2吋26萬色LTPSLCD。彩芒唔單止可以聽歌咁簡單，新玩意可玩埋睇相，可支援BMP圖片格式。iFP-900共有3種容量，256MB、512MB及1GB，可放MP3或相片。除換上彩芒之外，iFP-900亦比前作更長氣，最長可連續播放40小時。其他強勁功能則有XtremeEQ及3D立體音效、CD直接錄製及智慧偵測錄音等，規格提升之餘功能亦照樣強勁。
支援格式：MPEG3、WMA、ASF、OGG
容量：256MB、512MB、1GB
電池：內置鋰電池
播放時間：40小時
功能：錄音、收音機、3D音效、LineIn
體積：64×51×20mm
重量：62g
推出日期：8月（售價未定）
重頭作PMP-100之前已經有模型展出，今次展出實物，同樣有吸引力。PMP-100機身唔算大，一隻手掌已經可以拎得晒，而且內置3.5吋TFT芒，再加上40GB容量，足夠令一眾手提DVD播放機生產商頭痛。支援MPEG4、WMA、ASF及JPG等主流檔案格式，睇戲、聽歌、睇相統統冇問題，亦可接駁至電視作聲畫輸出，玩盡多媒體。今次難得等到實物現身，當然要睇睇效果如何，播放WMA影片相當流暢，聲音與畫面亦配合，未見到窒礙與唔夾口形情況出現，期待度爆晒燈。
支援格式：MPEG1/2/3/4、WMA、WAV、ASF、JPG、XviD
容量：20GB、40GB
電池：內置鋰電池
播放時間：5小時
功能：錄音、收音機、LineIn、電視輸出
體積：139×84×31.7mm
重量：280g
推出日期：8月（售價未定）
