李鵬飛飛哥如果出番嚟參選立法會，隨時可能係票王；皆因飛哥噚日喺書展搞簽名會，雖然下晝三點至開始，但成個鐘前已經有好多fans排隊；恒生銀行副董事長兼行政總裁鄭海泉重係第一個搶住要飛哥簽名，有線新聞之花張寶華亦有嚟到：「我特登嚟排隊支持佢，排咗半個鐘，咁大個人第一次排隊攞簽名。」兩個人重一齊合照㖭。
飛哥嘅讀者有男有女，有老有幼，唔少重帶埋相機嚟合照，袁女士話無試過好似fans咁攞簽名：「但係佢真係講咗我哋嘅心底話。」九歲小讀者廖希彤話：「我成日陪媽媽聽佢嘅節目，𠵱家無得聽。」結果一個鐘簽名時間，有成百幾個讀者排隊攞簽名，有工作人員笑住話：「嘩，同容祖兒嘅fans差唔多！」
飛哥多謝讀者支持：「佢哋話我本新書《風雨三十年》爆咗好多料，但唔夠喉，叫我爆多啲！如果將來有機會可能會寫多本。哈。」
另一邊廂，《快週刊》副社長程介南，就同一時間同台為新書《365夜》搞簽名會，讀者就少好多，但係嚟嘅都好有心，好似徐小姐咁，佢曾經係程介南嘅學生：「佢當年好努力咁教好學生，我會尊敬佢。」因為無乜人攞簽名，程喺台上好悶咁望吓自己嘅書，但都坐足全場，重同飛哥握手影相，算有「體育精神」。八方問佢得咁少人攞簽名嘅感想，佢就話：「我本書係寫畀自己睇嘅。」
傳真︰2623-9278
電郵︰