今個禮拜最多人講嘅潮界話題要算係日本猿人為慶祝香港SillyThing周年紀念，所以特別為佢哋做咗個賀禮，就係限量版SillyThing猿人頭Tee恤。上個禮拜打開報紙就見到潮星阿Yan着住，然後打開雜誌又見到創意搞手TK着住。自從呢件Tee一曝光，立即觸動咗好多潮界兒童嘅神經線，水貨大亨袁仁祥對呢件事最多嘢講：「其實年頭我已經收到風會出呢件嘢，不過你知我份人把口有幾密，所以費事周圍響，𠵱家終於證實我收嘅風冇錯！既然呢單嘢揚咗，我唔怕爆啲料你寫吓喇，呢件Tee有兩個款，一款係淨色，另一款係迷彩。兩款都係用經典圓圈嘜猿人頭，呢個Print好耐冇出，聽講日本仔唔係大單嘢都唔用呢個經典圓圈嘜。出嘅數量好少，只用嚟送畀圈中好友，唔會公開發售，不過可能有人到手後扔上eBay賣就另作別論。我有個客係eBay大炒家，叫Andy唐，佢話為咗呢件Tee重想混入SillyThing做㖭。聽講其中一件Tee遲啲會喺一本以Nigo做封面嘅書度送畀讀者，到時大家可隨時做嘢喇！」
主持人：大食Jack
八卦熱報：