盧絲出碟硬撼Victoria繼續唱碧咸

因為自爆同萬人迷碧咸（DavidBeckham）有一手而火速上位嘅盧絲（RebeccaLoos），隨住佢同碧咸單緋聞淡化，近排亦少咗蒲頭。不過有唱片公司覺得盧絲依然有利用價值，重打算捧盧絲做流行歌手，一於同碧咸愛妻Victoria打對台喎！

投資三百五十萬
近日英國有傳聞話BMG唱片公司打算一擲二十五萬英鎊（約三百五十萬港元）畀盧絲出碟。不過又有另一消息透露，唱片公司暫時唔敢冒咁大險，所以打算幫盧絲出一隻細碟試一試個市場反應先，之後出唔出大碟，就要睇銷量而定。唔少人重認為盧絲食住佢同碧咸嘅緋聞，極有可能打上唱片流行榜第一位㖭！
其實盧絲喺早前無論出席首映禮、接受電視台訪問以至做埋八卦節目主持，都係借碧咸過橋，今次佢新歌嘅歌詞，唔知又會唔會親手寫番佢同碧咸嘅偷情史呢？
而Victoria喺年尾同樣會出碟，我羅拉提議唱片公司不妨將盧絲隻細碟同Victoria隻細碟同日推出玩對撼，咁就夠晒有噱頭啦。