郭富城、歐陽妙芝、洪欣同鄧穎芝噚日喺新都城中心出席「姿采活力迎夏日」活動，城城下月推出新碟，現場觀眾只需捐出一百蚊，就可以得到城城嘅簽名同CD預售券，所得款項會捐畀郭富城慈善基金會，噚日大概有四十位fans排隊攞簽名。
城城上台教小朋友做啦啦隊同唱歌，似乎好鍾意小朋友，現場重有兩位來自加拿大國家體操隊嘅成員助陣，好鬼熱鬧。
而嘉賓之一嘅歐陽妙芝同洪欣都扮到靚一靚到場，但係鄧穎芝就着得比較普通，佢應邀上台示範高空絲帶花式時話自己雖然有跳舞底，但事前冇心理準備示範，又冇打底，驚會走光。之後又展示背脊嘅紋身，佢話：「係十六、七歲嗰陣紋，當時年紀細，冇考慮清楚，𠵱家就知道後悔。」
採訪、攝影：何永寧
劉德華前晚扮演的士司機，喺跑馬地同伍詠薇拍攝新歌《按摩女郎》MV，伍姑娘趁機向華仔訂購演唱會門票，而向太又要求華仔再加一百張，令華仔頭痕不已，佢話：「向太一向都好錫我，我惟有cut老竇啲飛畀佢啦！」
李逸朗噚日去旺角出席一個頒獎禮時，對於無綫藝員因長時間工作後撞車，佢不斷幫無綫講好話，佢話自己拍劇以嚟都有好充足嘅睡眠時間，不過佢又話報紙出嚟講嘢嗰班都係阿哥、阿姐級，佢自己啱啱先拍劇，都係唔敢亂講嘢。李逸朗又大讚無綫嘅人好識利用時間，一定唔會臨埋位先飛車返廠，意外嘅嘢應該係個別事件。
邵氏近日重新推出一系列舊戲影碟，噚日喺中環舉行發行儀式，米雪、張徹遺孀同李麗麗都有撐場。米雪係邵氏訓練班出身，拍過多部邵氏片，又拍過已故名導李翰祥嘅風月片，佢話：「我都係做啲小角色，唔使好風月嘅。林青霞同張艾嘉套《紅樓夢》，我都演薛寶釵，不過我最想睇番林黛嘅《江山美人》。」張徹遺孀移居美國，近日返港，佢話唔係好習慣外國生活，只好睇書打發時間。
近日有報道話那英老公高峰原來有個私生子，又話呢個消息係由那英家姐嗰邊那辛爆料，激到那辛死死吓，噚日佢即刻發聲明，話有關高峰嘅事，佢從來冇接受傳媒訪問，亦冇發表過任何睇法，啲人咁樣寫，對佢哋一家人造成好大傷害，那辛又話：「請不要再傷害那英！」
有線衛視新知台同台灣嘅東森電視合作，噚日喺台灣舉行簽約記者會，東森日後可以透過有線，攞到更多嘅藝人資訊，有線亦可以透過東森，喺北美同南美地區播放。有線節目部執行董事徐小明話，今次同東森合作順利，相信不久將來有線亦可以喺台灣落地，佢重話好多香港藝人會去美洲登台，今次嘅合作，可提高香港藝人喺美洲嘅知名度，對娛樂圈嚟講係一個喜訊。
