6月13日，「一周兩件」推新世界（017），翌日收5.95元，周內最低見過5.3元，之後無回頭，最新造價6.5元。若果有跟進，最低回報接近一成，成功撈底者，回報更加超過兩成。繼續持有，皆因大行又有Followup。
上次提過，新世界最近一年再獲不少名牌，好似美林、瑞銀及里昂垂青，發表睇好報告。呢個月，名牌又見跟進，其中里昂就話中港經濟大融合，可以帶動旅遊、零售及物業市場向好，地產及收租股屬於受惠者，建議吸納股份當中就包括新世界。
至於荷銀所發表報告，實牙實齒訂定新世界目標價9.4元。無獨有偶，一波亦同樣將新世界目標價定於9蚊樓上，睇9.9元。以名牌目標價參考，往後回報，分分鐘5成樓上，原來後邊先啖啖肉，有貨，又點捨得走？
事實上，包括九倉（004）、恒隆（010）、希慎（014）等大型地產及收租股，近期炒零售及經濟復甦概念，股價已經升到貼近或者超過每股資產值，至於新世界，現價相對每股資產值15元，重有超過5成折讓。新世界，有排炒。
和記環球電訊（757）上周五失驚無神急升，成交創過去8日新高，達5719萬股。集團將於下月16日公布中期業績，偷步炒業績，又略嫌太早，但和記環電有個賣點，就係份屬超人系。
近期二三線風雨飄搖，缸邊友手痕，除大價股或者窩輪，炒細價股，要揀都會選擇名牌，此股經上周五以大成交突破最近兩個月橫行頂，屬於強勢破位格局，但基於屬順手撈貨仔，最好自定去留。
錢雋