郭可盈性格硬頸倔強，別人做錯事，她會不留情面指摘，不過，隨着年紀漸長，加上受到包容量極廣的夫婿林文龍影響，她立下決心改變，盡量收斂火爆性格，雖偶有「失火」，她表示還會努力學習。
郭可盈和林文龍年初時結束九年愛情長跑，展開人生另一頁，可盈大讚夫婿是上天賜給她的「守護神」，他們多年感情歷久常新，相處秘訣是互相體諒。
可盈和文龍同是藝人，大家作息時間不同，會盡量爭取時間見面。可盈坦言九年間偶有爭吵，但每次都是為一些雞毛蒜皮的事，她說：「你𠵱家問番我為乜嗌交，我都真係記唔起，因為每件都係芝麻綠豆嘅事。」那可是每次都由文龍𠱁她才得以平息小風波，她說：「我覺得兩公婆吓吓要𠱁，邊𠱁得咁多。」
可盈表示自己沒有一套「御夫術」，她解釋：「我覺得愛情係冇一條方程式，要運用方程式嘅就唔係愛情，一段真正嘅愛情只要兩個人相處開心，而我絕對相信文龍係上天賜畀我嘅另一半，佢喺生活上好照顧我，可以令到我好放心去做任何嘢。」但不論二人關係如何親密，婚後仍堅持財政獨立，可盈亦贊成女人應留一些私己錢傍身。
認識可盈的人都知道她是一個脾氣頗大的人，她直認不諱說：「我嘅外表同我內在性格好唔同，我承認自己都幾火爆，天生性格好硬頸同倔強，工作上遇到有人做錯嘢，我會火遮眼，好唔畀面咁鬧佢，比如助理編導mark錯衫，我都會鬧佢。我鬧得就唔會有錯，佢一定係唔啱，我基本上脾氣係大，但就唔會亂鬧人嘅。」
可盈近年篤信基督教，加上感受到文龍一直對她的包容，因而想到要改變自己的缺點。可盈說：「個天咁好，賜咗文龍做我老公，我都要的起心肝嘗試去改吓自己啲脾氣，遇到人哋做錯嘢，我要盡量將情緒平靜落嚟。」可盈直言有時都會忍不住失手，但不會氣餒，還會繼續學習去包容別人。
郭可盈和林文龍的事業雖各有千秋，但外間一直覺得女方較優勝，可盈可會擔心這個現象會令文龍有自卑感？她說：「我完全冇擔心過呢個問題，因為文龍係一個EQ好高嘅人。」
不過可盈一直很留意文龍的情緒變化，她說：「或者我係一個唔善於表達嘅人，不過只要人哋為我做嘢，我係會感受到，但就唔會刻意表露出嚟。我未必會刻意為文龍做番啲嘢，不過會喺心中加佢分。」
可盈承認娛樂圈中女藝人往往比較男藝人佔優，她說：「女仔曝光率會高啲，而且就算去內地剪綵，多數都會請女藝人去。」
可盈的事業雖稍勝文龍，但她亦非常欣賞文龍的專業精神和工作態度，她說：「我知道文龍做起嘢嚟都好努力，但有時呢行真係好講機會同際遇。」
問到可盈打算甚麼時候「造人」，她說：「暫時我事業心都好強，我對工作重好有熱誠，或者兩、三年之後先準備生BB，我覺得一個幸福家庭有埋仔女會完美啲。」可盈表示將來做媽咪，會在嬰兒出世至成長的頭幾年全面停止演藝工作，專心湊孩子，希望她可以如願以償。
採訪：比華利
攝影：林德雄
場地提供：Bamboo（蘭桂坊）
髮型：RitzLam（HipHairCulture）
化妝：江中平（A&VMakeupSchool）
服裝：Change
