人靠衣裝，車講包裝，有得俾你揀，十個有九個都寧願畀多少少買架「型仔」嘅，揸出街起碼都有人望吓，好似今期介紹呢部WagonR+，前幾個月先出完04新版本，到最近又落重本加強裝備變特別版，有幾特別？睇完再講！
記者：黃婉冰 攝影：陳偉強
年中都有唔少品牌話會出甚麼特別版、精裝版、升級版，今次一聽見話WagonR+都出特別版，真係忍唔住想問句，又有幾特別？視察完後，發覺今勻又真係玩得幾「特別」，幫個殼扮靚、換皮椅、加窗簾都唔止，重玩埋音響，特登搵KENWOOD幫手度身訂做「fung機」大喇叭；頂置式安裝喺後座，SIZE啱啱好，一開機，成隊Band好似坐喺你後面，聲靚樣又正，就算唔係經常性「fung機」，就咁齋擺都夠煞食，潮友們，有無心郁感覺？
同WagonR+未有親密接觸前，確實懷疑過究竟有無力，坐落去會唔會頂頭？經過一輪簡單而又深入嘅了解後，發覺呢部車仔確有唔少令人驚喜之處，先係力度，1300ccVVT-16氣閥引擎，坐上三個大人，起步有力，反應敏捷，上斜雖然例牌要略為加油，但當按下O/DOFF模式後，波箱就會全程保持3波，上斜未見有唔夠力情形出現。試完性能，跟住梗係試座艙舒適度，唔會頂頭頂腳，但可惜後座分布比例略嫌美中不足，五五分布，坐中間舒適度未必及兩邊。
引擎：1328cc直4DOHC
馬力：88ps/6000rpm
扭力：12kgm/3500rpm
傳動：四前速自動波
懸掛：(前)麥花臣(後)獨立拖曳臂
制動：(前)透氣碟(後)鼓式
輪胎：165/55R15
尺碼：3575×1600×1695mm
軸距：2360mm
新車售價：$140,000
車輛提供：香島汽車（23320091）
唔好睇車仔細細，查實個尾箱同車廂變化拍得住七人車，而且空間容量一樣唔弱，唔信擘大眼睇睇！
