一位讀者F來電郵，竟然問及家中廳心位置嘅吊燈壞咗，應否更換？事關佢剪存本欄年初嘅《開工吉日》，內裏提及易學會傅會長之言：「凡廳心、房心位置，皆不宜動土、修理天花……」老實講，左丁山唔識答、唔敢答，為咗生活方便，換廳中吊燈，如果唔涉及修理天花，梗係應該換啦。不過讀者F既然有啲驚，就應該問真專家，唔係問我。我只係識少少，扮代表啫。自己有風水疑難，都係要請王亭之徒弟葉漢良望一望也。
王亭之另一個徒弟大編輯趁書展開幕，送左丁山一本新書，名為《紫微斗數精解》，作者呂可風，據大編輯講，呂可風並非真名，只係一位成功人士嘅筆名。「呂」先生在香港大學讀社會學，具碩士學位，偶然機會之下，在港大馮平山圖書館讀到宋代邵雍《康節說易全書》，內有紫微斗數部份，於是在好奇心驅使下，開始學習研究，此乃十幾年前之事咯。舊年呂先生俾大編輯死纏爛打之盛意感動，於是將佢嘅學習心得，向讀者和盤托出。全書分三部份：（一）安星法基礎（現有電腦可代替，上kankanwoo.com，只須打下出生年月日時，成個紫微斗數命盤就出晒嚟；不過呂先生梗係反對咁樣做啦，因為唔識馬步，點識打真功夫呢？）（二）談斗數嘅星曜性質，講解星曜符號與意義；（三）推算方法，實例說明之。
葉漢良教過左丁山睇紫微斗數命盤嘅皮毛，於是翻閱此書，叫做明啲唔明啲，如果讀者有時間慢慢照跟，可能學到晒啲入門功夫。由於此書作者讀現代社會科學出身，佢嘅寫書方式幾系統化，好易睇。