收到風！今個星期出《大事件》真係非常突然；小記一向都係杜琪峰戲迷，每有新戲上畫都唔會錯過，就係呢套6月中上畫嘅《大事件》去唔切戲院睇，咁又話落畫。估唔到佢落畫未足月，就十萬火急出DVD，正所謂街邊電影海報都未拆得切，DVD碟又話見街嘞，真係連宣傳費都慳埋。但唔知捧場入戲院睇嘅人，又會點睇呢！
記者：朱崇德
套DVD星期四派街，相信唔少碟迷同小記一樣，一放工就衝落碟舖朝聖又朝「貢」！$79竟然係dts-ES（6.1聲道）；舖內一早企滿成班杜Sir戲迷，大家只係睇咗頭幕8分鐘一Take過嘅槍戰，嘩！畫面唔錯，子彈槍炮聲效，真係聽到人有毛髮直豎嘅感覺，所以碟場人都一致推薦呢幕為dts-ES最佳試機碟！
發行：鉅星錄像
區碼：3區
$79
故事開首講述重案組的恒（張家輝飾），部署捉拿元（任賢齊飾）一班悍匪，後不幸演變成街頭槍戰，而且更被傳媒拍下有警方人員，在陣前向匪徒舉手投降的相片；令全港市民嘩然之餘，警方威信亦頓時蕩然無存。為重整士氣，警方副指揮官Rebecca（陳慧琳飾）想出史無前例之舉，向傳媒現場直播捉拿悍匪的整個過程，這是一場警匪之戰，更是一場傳媒爭奪的戰爭！
如果係標準戲迷，都會發現《大》有好多不同電影的影子；首先是小齊做的悍匪，他一下看穿警方作電視直播，是為了威信救亡的手段，再利用傳媒發報消息令警方陷於困境，令人好易聯想早年的《冇數講》，但相對之下，人哋係談判專家出身，小齊則是一個冇背景悍匪，相形之下令故事感覺較薄弱及不太合理！
另外一幕，小齊着草走佬，全Team人只有Kelly發覺而尾追不捨，感覺簡直是《暗戰》中劉華同劉青雲翻版，太多舊影子包袱，難免令人有點東拼西湊的感覺，此外Kelly做的強勢副指揮官，及張家輝飾的莽警，都有點略嫌過火，亦是令電影大打折扣所在。如問整套戲評價，可以肯定是一般港產片水準之上，不過由於導演係杜琪峰，所以就有啲唔收貨。
警匪故事溝槍戰場面，加上警隊部門間的衝突，令人好易又聯想到去年的《PTU》，不過《PTU》就用咗2年時間拍竣，相反《大》就連住《柔道龍虎榜》一連出兩套，杜Sir拍片真係非常有彈性！全套片可以主力Sell兩場槍戰場面，一是開場一Take過的一幕，拍得幾有壓迫力，警方俾任賢齊飾嘅悍匪打得節節敗退，睇慣小齊做大情人，估唔到竟然可以咁兇悍；尾場煞科嘅舊唐樓大戰亦非常緊湊，警匪間鬥智角力，好有早年杜Sir《非常突然》Feel，亦值得一睇再睇！
