當球迷今日將視線放喺美洲盃決賽同埋世冠爭霸戰，其實皇家馬德里作客賓菲加嘅友賽一樣矚目。碧咸重返傷心地里斯本，誓神劈願今場波無論任何情況都唔再射十二碼；呢位失意球星重講從來冇諗過離開皇馬。
唔計之前同不知名球隊拍跳，呢場本來係教練金馬曹首次領軍對頂級聯賽球隊，亦係倒戈；但因為碧咸響今屆歐洲國家盃同一球場（盧斯）射失過經典十二碼，所以焦點去晒後者度。
碧咸賽前話：「我喺呢個地方有段不快回憶，今場十二碼點都實由費高射晒。」佢同時講到從冇意圖離開皇馬，不過佢過去半年咁沉，連曾經盛傳有心買佢嘅車路士都無出手，以佢身價又唔係人人都養得起。碧咸除咗皇馬，真係無處容身，怕且就算佢想走都唔易。
華倫西亞教練雲尼亞里日前質問阿根廷國家隊教練比爾沙，問佢點解召艾耶拉踢美洲盃，而跟手又要踢奧運，根本冇時間唞。反而皇馬件阿根廷新兵森美爾就兩個賽事都免役，擺明大細超。話晒隊波今季大執位，幾時都想艾耶拉以最佳狀態比賽，雲尼亞里有怨言係值得理解嘅。
我哋體育版之前報道過，利物浦已經唔再睇迪奧夫台戲，之前公布球衣號碼都冇預佢，而日前紅軍公布美國之旅嘅廿三人大軍名單亦冇份，深化佢響利物浦唔慌有前途嘅說法。呢位塞內加爾前鋒都算威過，當今球壇冇幾個好似佢咁後生（廿三歲）就咁落泊，係時候諗諗自己前程嘞。
NBA球星拜恩單強姦案就快開審前，噚日就收到好消息，係法官批准原告人遇到拜恩之前三日嘅性生活可作為裁判依據。美國當地嘅法律專家認為，呢個決定對一直唔認原告人陰道傷勢同自己有關嘅拜恩十分有利，呢位湖人球星如判冇罪絕對唔奇，拜恩擁躉知道會唔會鬆口氣呢！
NBA騎士隊近日喺轉會巿場好活躍，早兩日從76人簽咗後衞史奴冇耐，噚日又同魔術隊達成交易，用巴迪同兩個次圈選秀權換嚟前鋒古登，雖然古登級數唔及離隊嘅布沙，但勝在夠後生、有天份又唔係貴，睇怕呢次交易可以稍為彌補布沙「變節」爵士嘅傷痛啩！