李鵬飛噚日喺有線中環新聞直播室出現，八方見佢神采飛揚，原來佢前晚剛剛由澳洲達爾文港度假回港，唔怪得啦。
飛哥同八方講，佢今次旅程，頭兩日咁啱同媽田同行，報名入團時撞到嗰種，大家一齊喺大堡礁玩，媽田好似個細路仔咁，喺水裏面游咗好耐，忽然見到大群魚游過，十分興奮。
阿飛話知道媽田排第二出選，覺得佢個人好豁達、唔自私。不過，由於阿飛答應有線電視趙應春同佢哋主持選舉論壇，為咗以示公正，以及無謂左右逢源，佢決定唔為任何人助選。
對於佢啲自由黨前黨友今次唔再派二打六嘅人馬出直選，而係由田少、周梁掛帥，佢認為係一大進步，否則點解要組黨？阿飛又話，自從佢辭咗人大，都有人邀請佢上京傾傾辭職嘅嘢，但佢一啲都唔想傾，雖然佢辭職嘅手續未通過，港區人大會議繼續有邀請佢參加，但佢都唔會去。講開當時狠批佢嘅英文《中國日報》，已經自由自在嘅阿飛即刻大罵該報「揸住雞毛當令箭」！
傳真︰2623-9278
電郵︰