國務院人事部噚日終於發出一段簡短嘅人事任免消息，話港澳辦公室副主任徐澤已被免職，平調去澳門做澳門中聯辦副主任，今次調動，明眼人都話係燉冬菇，皆因澳門比起香港，無論大小同重要性都有好大分別。
早前釋法，徐澤都有嚟香港，有人話佢官威十足，曾怒斥陳太，又多次教訓港人。其實係人都知，香港人受軟唔受硬，如四大護法般嘅惡形惡相做法只會引起更大反響。徐澤調走之後，魯平喺港澳辦嘅影響力可說是愈來愈細，快等於冇。
八方記得，當年港澳辦初成立，中央由廣東物色人選上京，徐澤同早前退下線嘅張良棟齊齊獲賞識，重升至司長之職。徐澤同特首身邊紅人陳建平係老相識，同係由魯平一手提攜，但係𠵱家就各事其主咯。
曾慶紅得勢，以前左口硬面嘅，睇怕都要讓路咯。至於接徐澤嘅張曉明，就人人都覺得佢較溫文有禮，熟悉香港事務，加上獲廖暉信任，應該可有啲作為。
傳真︰2623-9278
電郵︰