藝術家阿虫噚日出席慶祝香港電車一百周年嘅活動，為佢設計嘅《名家系列》電車主持起步禮，佢突然間話「好想再做第二個人」，八方起初都唔明，原來七十二歲嘅阿虫，係想話遲啲唔再創作「阿虫系列」，要改頭換面，以全新抽象、純藝術作品示人。但阿虫迷放心，阿虫話重有好多嘢未放得低，唔係名同利，而係同擁躉間嘅感情。
阿虫今次同電車公司設計嘅名家電車，好可能係「阿虫系列」中最後嘅大型作品，佢嘅靈感嚟自六、七十年代嘅香港，包括以前企喺十字路口嘅交通警。電車𠵱家係香港最平嘅交通工具，但阿虫話喺佢細個時，電車係高高在上，好難先有機會搭。
阿虫之外，電車公司重請咗水禾田同埋張瑪莉各自設計一款作品，將會用嚟裝飾六部電車車身，由今個月二十八號起就會行走主要電車路線。但如果各位想唔使錢搭「霸王車」，就可以喺七月三十一日朝早六點至夜晚十二點，喺電車站等吓呢六架車。如果你想再進一步，將阿虫電車變成私人珍藏，今日就可以親身到跑馬地電車總站買阿虫設計嘅限量紀念月票，首一百名認購者重可以得到阿虫親筆簽名㖭！
傳真︰2623-9278
電郵︰
