由金像影后荷爾芭莉（HalleBerry）同莎朗史東（SharonStone）主演嘅電影《貓女俠》，將於下個星期五喺美國上畫。不過美國唔少影評將套電影踩到一文不值，雖然由漫畫改編嘅電影向來都有一班捧場客，不過今次《貓》片收唔收得，就真係好難講嘞！
其實呢套戲係講述荷爾喺一間大型化妝品公司度俾老闆莎朗史東陷害，後來荷爾喺死亡邊緣俾隻神貓救咗，結果佢就變咗貓女俠，並向莎朗史東報復。美國嘅影評人睇完套戲，話《貓》片嘅劇本係三流，根本毫無說服力。
其中《紐約時報》話：「《貓》片係一齣非常愚蠢嘅動作片，毫無意義可言。」而《紐約郵報》就話：「荷爾將自己變成三流性虐女王，性感程度猶如一嚿貓毛。」此外，片中強調荷爾變身貓女俠後非常打得，不過影評就唔多認同，佢哋話製片人意圖用剪接技術掩飾片中電腦特技嘅不濟，而片中貓女俠嘅特技動作場面，實在令人難以信服喎！其中有人重用「Cat-astrophe」（大災難）嚟諷刺套片，睇嚟荷爾做完貓女俠，重有大把貓麵要食。