AC米蘭前鋒恩沙基近排都幾運滯，繼無份踢上個月嘅歐國盃後，近日因為搞唔掂足踝傷患，要唞五至六個禮拜。咪以為踢唔到季前熱身賽係閒事，當基仔好番嗰時隨時發覺自己個正選位已經俾另一「基」──基斯普坐咗，到時真係有排「唞」嘞。
AC米蘭官方網前日發表聲明，話基仔肯定因為有傷踢唔到嚟緊嘅「美國之旅」，同埋下個月中喺的黎波里對拉素嘅意大利超級盃。
好明顯，佢養傷對球隊影響未必太大，但就益咗基斯普；因為呢段期間AC預料會大部份時間用基斯普拍舒夫真高攻堅，有更多時間畀佢兩個培養默契。唔好忘記重有個愈戰愈勇嘅湯馬臣，基仔好番之後，可能已經變咗另一個世界囉。
足球喺奧地利一向麻麻哋受歡迎，但奧地利國家隊喺九月四號喺主場對英格蘭國家隊嘅四萬二千張○六年德國世界盃外圍賽門券，竟然喺八粒鐘之內俾啲球迷掃晒。點解會咁？唔知係咪因為英格蘭陣中粒粒星，除咗有靚仔碧咸同奧雲外，又有當紅炸子雞朗尼同埋愈嚟愈有大將之風嘅林柏特，就算奧地利人對足球呢樣運動唔係太過狂熱，點都要嚟趁吓熱鬧啩。
上季協助母會卡利亞里由乙組回升甲組嘅名將蘇拿，來季就未必可以再着住卡利亞里戰衣喺意甲亮相，原因球會唔接受佢提出嘅新合約條件，拒絕同呢位前車路士前鋒再續新約！我求大俠聽到呢個消息之後就覺得幾激氣，話晒蘇拿當日有其他球會招手都唔理，義無反顧返歸回饋呢支乙組隊，重立下不少汗馬功勞；隊波𠵱家升班就唔認人，乜養多個蘇拿真係好難咩？
荷蘭籍嘅前巴塞隆拿教頭雲高爾，寄語剛收購古華特嘅紐卡素，要睇緊呢位前鋒。佢話古華特重未夠定性，甚至連職業球員嘅專業操守都冇，一定要好似佢自己咁軍紀嚴明嘅教頭至搞得掂。我求大俠唔理雲高爾係咪借啲意踩古華特而抬高自己，但佢梗係唔多清楚英格蘭東北部嗰邊生活比較苦悶，冇乜娛樂，並唔似得倫敦等大城市咁多采多姿，古華特呢次想曳都難啦！