唐英年呢輪笑口常開，皆因樣樣嘢都好順，失業率回落、官債賣得好，連困擾咗香港五年幾嘅通縮，下個月都分分鐘同特區講再見，你話係咪值得慶祝？
八方噚日笑佢官債超賣，晒命之餘可能講多咗，佢位新聞秘書羅先生第一時間打電話嚟澄清，話佢哋已經好小心講嘢，乜都問過法律顧問，講得先講，如果有人自己咁叻喺度計出美國債券部份超額條數，就與佢哋無關，何況佢哋白紙黑字嘅稿件一個數字都冇提，就連網上睇到嘅機會都避埋。係啫，不過係人都知美國佬好嚴，以後都係忍下口為妙啦。
官債下星期喺香港交易所上市之後，唐唐會乘機放假慶祝吓，同屋企人出外玩吓充吓電，因為回港冇幾耐，又要開始為下個財政預算案做諮詢嘞。
傳真︰2623-9278
電郵︰