中午行街，碰到專業C。專業C唔算高，但佢身旁位公子就好高喎，近五呎八九吋，專業C話：「個仔讀完中二，暑假後去英國寄宿。」十三歲啫，咁快去英國？專業C話：「佢班同學仔已經走得七七八八，所以佢都想過去英國。」名校中一、中二生有好多名門子弟，中三之前就走得就走，所以貴子弟中一派位派唔到入中半山名校，唔使怕，如果成績好，申請入學做插班生，大把機會。
專業C預備參加功能組別競選，問佢報名未？佢講：「睇緊通勝，要擇番個良辰吉日先。」報名參選要睇通勝，左丁山初以為係個別情況，點知返到公司，幾個人打電話嚟搵左丁山幫手擇日，為老細報名參選報名（為免誤會，代查通勝是舉手之勞，免費嘅，唔會影響競選經費）。呢啲老細似乎係幾西化之人，其實專業C亦係西化到不得了，點解一到報名參選，就要睇通勝呢？似乎中國人嘅性格係寧可信其有，唔好蝕底先。
既然如此，各選區民政處嘅忠心公僕唔該注意吓，喺吉日吉時之際，唔好行開，最好預備多啲人手，以應付準議員報名；凶日凶時，公僕就可以蛇王一陣歎吓茶。睇真啲，七月廿二至八月四日報名期，共十四日，最曳係八月二日星期一破日，諸事不宜；七月二十六日閉日麻麻哋。好日子就有七月三十一日、八月四日。七月廿九亦唔錯，起碼由朝早七時至下午五時都係吉時，啱晒辦公時間。
擇日未必一定要查通勝，打個電話畀賓架S，佢袋住一部Palm，已經下載晒通勝裏面嘅日曆，一㩒掣就知。參選除咗擇吉日之外，亦要不斷參考科學方法—抽樣民意調查，呢排民調機構忙到飛起，W博士話：「請學生時薪五十，有就介紹！」學生嘅工作好簡單，就係不斷打電話。