自從先科國際（724）被廉署調查之後，大部份細價股已經偃旗息鼓，令到愛冒險的小初，想搏命都唔易搵對象，好彩呢幾日重有幾隻零售股可炒，但可惜都係炒短線為主，之前有組織及有部署的大型炒作活動，根本唔多見。
此外，同時因為冇乜人夠膽在風頭火勢下維持秩序，所以好多股仔走勢變成自由浮動，而且大部份係向下游，唔係向上游。
好似由公路大王持有的茂盛控股（022），最近股價唔多好睇，今個月由高位2.60元跌落嚟，話咁快就跌穿2元關，噚日更低見1.65元，好彩低位識得彈，抽回1.75元收市，倒升1仙。
經紀陳話，茂盛股價表現咁差，主要係隻股兩次延遲公布全年業績。此外，上個月曾公布注資，但交易一直未能完成，令到江湖傳聞多多，再加上平日玩開嗰班炒家又放軟晒手腳，所以茂盛股價先至會搞成咁。
睇嚟隻股要澄清所有傳聞，兼出埋業績後先至有得諗，短期而言，都係少掂為妙。
慕容小初