深圳係港人北上消費熱點，唔少順手買番個單位自住或投資，但羅湖市區住宅，平極都要三四十萬，近年出現啲迷你單位，二三百呎，好似「東門168」咁，最細只得二百零四呎，賣價十五萬起，月供六百零，對香港人嚟講，不難負擔。
個盤本月十八日喺當地內購，唔夠一粒鐘，賣出逾四百伙。
不過，若果港人想買，都唔使怕走雞，個盤共有逾千二伙，月底嚟港發售，首批三十二伙，售價十五萬至十八萬，呎價六百八，與內購價相若。
恒基西灣河嘉亨灣密集式宣傳，日日有新意，噚日就設計份嘉亨灣海景套餐午宴菜單，由恒基營業部總經理張炳強，同埋中華煤氣工商市務經理黃維安合作，喺尖沙嘴TowngasAvenue，炮製一味「嘉亨熱賣卷」，寓意樓盤賣個滿堂紅。
張炳強一身廚師打扮，有板有眼，材料有蝦、薯蓉、紅椒等，佢負責將材料用腐皮包好再炸，佢話一向甚少落廚，屋企個爐都唔知幾耐無開過，所以今次為咗嘉亨灣，係「處男下廚」。
兩個廚男請嚟食家唯靈做評判，結果佢認為黃維安嘅手勢好啲，為咗慶祝兩個廚男首次下廚，重封咗兩封利是畀佢哋。
噚日又介紹物業嘅智能天地，加入咗智能家居系統，住戶就送首兩年寬頻上網服務。
西灣河嘉亨灣開賣日期漸近，各大代理行都做定準備工夫，利記噚日搞「嘉亨灣海上大巡禮」，用幾千蚊租隻船，安排二百幾個職員，近距離接觸，加深對個盤嘅認識。
另外，利記又租咗鯉景灣D段（即係近逸濤灣一邊）室內停車場，月租二十萬，共有五十個車位。計埋其他宣傳費，估計要動用一百萬。
蘭西記得，之前中記都話，喺同區租咗個車場，有六十個車位，畀啲客睇樓用。中記同利記相繼出招，睇嚟好快就到對手美記同港置有動作嘞。嗰區有排熱鬧。
投資者愈嚟愈進取，地產代理辦講座係吸引佢哋嘅好方法，因為經常爆棚，個個都勇於發問。
中原工商舖部，不時搞講座，等有興趣買家出席，交流意見，日前就揀咗觀塘某酒樓辦講座，皆因主題同工商物業有關。中記話百幾人到場。
講座針對工廈更改用途，為物業增值，以及保值兩方面出發，中記以「山雞變鳳凰」與「十厘回報何處尋」作招徠，夠晒傳神。
辦講座呢招，遲吓可能成為吸客新趨勢，各區都會有呢類活動，唔再局限喺傳統核心商業大廈內舉行。
蘭西
電郵地址：
