爭住着消防衣做小小消防急先鋒
電視劇或電影中，我哋經常都會見到穿着整齊消防衣嘅消防員，戴上頭盔，衝鋒陷陣去執行滅火、搜索同救援等任務，好不英勇！許多小朋友更視消防員為偶像，希望可以近距離接觸佢哋；暑假剛剛開始，我哋就為小朋友安排一次消防局之旅，一行30人去到位於粉嶺的消防局參觀，除咗有唔同嘅消防設備，小朋友着起件迷你消防衣，更加係英武不凡！
記者：鴨比姐姐 攝影：驢仔哥哥
鳴謝：粉嶺消防局
消防車知多啲
近距離接觸，先知道原來消防車有好多唔同嘅滅火工具，參觀當日，消防哥哥歐Sir重向我哋介紹升降台、細搶救車及迷你鄉村車等各式消防車，想知佢哋有甚麼不同？即刻跟住我哋行番轉！
消防設備逐格睇
睇完消防車，就梗係逐Part睇清車內乾坤。細細一架消防車，裝載的設備非常齊全，重好先進㖭！
歐Sir(右)講解迷你鄉村車內各種設備，小朋友都細心聆聽。原來迷你鄉村車提供快速滅火系統裝置同輕型手提泵，以便火警發生時，可以快速熄滅火種。
這部升降台，車尾分別設有唔同嘅水龍頭，可以接駁唔同大小嘅消防水喉。
近距離睇真啲，又真係有好多唔同嘅水龍頭噃，恒仔(下)同Thomas(上)二話不說率先觸摸。
每條消防水喉最長可以達到23米，真係有成棟樓咁高！而消防水喉主要係提供取水及供水功能，方便火警發生時使用。
Dick仔坦言無諗過消防水喉會咁重，要用雙手先至拎得起。原來做消防員要好大力！
呢部名為K1200的爆破工具，可分別切割木、石頭及金屬等東西，勁！
同消防員
Friend過打Band
參觀尾聲，小朋友都同消防哥哥熟絡起來。而且大部份小朋友都係第一次面對面接觸消防員，當然唔會咁容易放過佢哋！
繩索係救人時嘅必備工具，小朋友對此都充滿好奇。
這個名為喉筆的東西，可接駁消防水喉，以調校出水柱或花灑的射水形式。
呢支鐵筆，一面尖頭，一面扁頭，前者專用嚟撬門，後者可挫去較銳利的東西。
上演制服誘惑
整個參觀過程，最受歡迎的環節莫過於着迷你消防衣！可以扮消防員，小朋友即時蜂擁而上！果然，個個都英姿颯颯，維肖維妙，好不威風！
最英勇嘅消防員，都難敵呢兩隻頑皮小馬騮！
晉諾：「等我讀好啲書，將來考入消防局，我都要好似歐Sir你咁威！」
Vincent坦言志願是當消防員，咁難得着到件消防衣，點都要做個勝利手勢！
Thomas雖然人仔細細，但着起件消防衣都似模似樣。不過，佢原來對件消防衣興趣不大，反而對消防帽就愛不釋手！
Patricia與Henrik兩姊弟，絕對係全場中最識得上鏡同擺Pose嘅小朋友，唔信，睇吓呢張相就知！