曾志偉同兒子曾國祥、柯受良（小黑）個仔柯有倫、林苑等，前晚喺深圳蛇口為內地劇《愛與夢飛翔》做宣傳。呢套劇係特別獻畀已故嘅小黑，故事構思都以佢做藍本，柯有倫重喺劇入面扮演一個特技人，但佢就話唔係演緊亡父。
柯有倫繼承咗小黑嘅特技天份，佢重即席駕駛電單車示範飛車落樓梯，但佢因為之前玩滑板整傷咗腰骨，所以佢都只係做咗一部份，佢話：「我都睇咗醫生，因為啲骨移位，醫生本來要我開刀，但怕影響套劇進度，我𠵱家等佢自己慢慢康復，時間要長啲。呢套劇我都有危險動作，我會搵替身。」
柯有倫表示開工前有去過亡父墳前禱告，提到媽咪近況，佢話：「媽咪𠵱家喺台灣做義工，佢心情平復咗，但有時都好孤單。」柯有倫話開工辛苦時都有諗起亡父，佢會借寫歌嚟發洩吓。
而志偉就大讚柯有倫演得好投入，佢又話大部份演員都冇收酬勞，該劇監製文雋話：「呢套劇希望可以為柯受良子女教育基金籌到五百萬，我哋每集成本都三十萬，唔平㗎。」
記者馮美茵深圳直擊
廖碧兒噚日去咗睇書展，對於有報道話佢同劉愷威分手，廖碧兒就話：「我哋一路都係好朋友，而唔係報道咁講話拍緊拖，我都冇睇到嗰啲報道，係朋友講畀我知，其實以前佢都係盡朋友義務車我，𠵱家我自己都有車，唔使佢車，最近我都好忙，每日都係得番兩、三個鐘頭瞓，遲啲得閒啲，都會搵佢傾番呢件事。」
梁漢文（Edmond）呢排開始為商台嘅歌舞劇綵排，噚日佢去咗商台度做訪問，佢似乎消瘦咗唔少，Edmond話：「呢排開始排劇，比之前嘅有更多內心戲要揣摩，而且重要跳舞。為咗呢套劇，我重推咗啲要飛去外地嘅工作㖭。」
黃琛如噚日以一身瑪莉蓮夢露嘅打扮擔任珠寶同化妝品模特兒，雖然黃琛如婚期仍未定，但就透露下個禮拜會同男朋友到峇里島預支蜜月，佢話：「我哋應該趕唔到今年結婚啦，到我結婚時一定會通知大家，而婚禮形式就會由雙方嘅家長決定。」
