關心妍（Jade）今年先後遭無綫封殺及遇上綁架鬧劇，近日又因照片外洩而令其處女寫真集延期推出，可謂十分黑仔。Jade坦言現時靠向母親吐苦水及玩狗減壓，更感到娛樂圈不宜久留，五年後她便會與娛樂圈講拜拜。
關心妍今年可謂十分黑仔，上月才剛被無綫解凍的她，原計劃在本月底推出處女寫真集及全新唱片收復失地，想不到近日因為一幀寫真集中的性感照片被提前刊登，唱片公司竟以打亂宣傳編排為由，決定將寫真集延期推出。
對於寫真集暫時推出無期，Jade日前接受本報電話訪問時無奈地說：「我都唔知做乜嘢事，好似重重障礙咁，但我控制唔到，唔出都冇辦法，我條命好似係喺荊棘中成長咁，但我有阿Q精神，唔會諗太多。」
Jade承認有時亦感到壓力很大，幸好她有一套個人減壓方法。Jade說：「我會同媽咪傾偈，吐吓苦水，同埋攬住自己隻狗仔一齊玩，好彩身邊都有好多朋友支持，點都會克服到難關嘅，我會堅持到最後一口氣為止。其實我次次都好爭氣，今次又係咁，又翻生再翻生又復活，我都成二十五歲，希望三十歲前可以唔做，因為我覺得娛樂圈係唔可以留得太耐嘅地方。」
談到現時的狀況，Jade自言似坐在摩天輪上，她笑說：「我好似喺摩天輪上面轉吓轉吓咁，以為好高但又可以跌到好低，發生完嘅事又發生，出錯完又再出錯，重蹈覆轍，轉到暈嗰一剎那，就睇你可唔可以抵受得住，轉嘅時候你識得欣賞風景就冇事囉。」問她現在是否覺得暈陀陀？Jade笑說：「未暈，重撐住，偶然重識睇吓夜景㖭！」
採訪：朱倬誼
攝影：何國豪
化妝：KamenLeung
髮型：DanielChou（HipbyHairCulture）
服裝：SistyrMoon
場地：Aluminiumurbanliving
