前任政務司司長陳方安生噚日喺「香港人壽保險從業員會員大會」任主講嘉賓，不過佢一開始就話對保險經紀印象麻麻，以前重曾經俾個經紀誤導。原來幾十年前陳太同老公，經唔起個保險經紀嘅極力游說買咗份保險，但保單供完後，埋單計數發現蝕咗一半，因為啲利潤俾通脹食晒！呢鋪令佢「經一事、長一智」。
陳太重笑住講古仔話，從前有個老竇同三個仔講：「畀你哋接受教育係我嘅天職，你哋唔使報答我啦，我死咗之後，你哋擺一千蚊喺我個棺材度表達心意就得啦！」
三個仔都學業有成，大仔做咗醫生、二仔做咗律師、三仔做咗保險經紀兼財務顧問。老竇死咗之後，大仔就擺十張一百蚊紙喺棺材上，二仔呢，就擺咗張一千蚊紙，最後輪到三仔，佢就擺咗張三千蚊嘅支票喺棺材上高，然後攞走咗二千蚊。台下千幾個經紀聽完個笑話後，一啲都冇唔高興，重同陳太一齊笑㖭！
（圖）估唔到精明如陳太都曾經被𠱁，誤買保險。
傳真︰2623-9278
電郵︰