恒指最深跌過149點，散場只係唔見74點。昨日之跌，係美股所累。同亞太區其他股市比較，港股算係跌得溫和。地產股撐得好靚，長實（001）、新地（016）、新世界（017）都能跌後升番前市水平埋單，信置（083）重有1格進帳，只有恒地（012）微微唔見0.9%。大市有主角股份，唔怕衰得去邊，有平貨要買，有平嘅地產Call輪，亦博得過。
和黃（013）最低53元，收53.50元，跌50仙，有長實帶住，和黃估計有得升，吼低買Call輪。穩陣格，買9390，11月尾到期，輪價61仙，溢價2.8%，槓桿率8.8倍，數據靚，嫌交投唔係太旺。搏殺少少，買9833，10月中到期，輪價36.5仙，溢價4.0%，槓桿率14.7倍。再搏殺啲，則揀9780，10月中到期，輪價24.6仙，溢價7.4%，槓桿率21.7倍。
石油股中，中石油（857）比較硬淨，收3.90元，只係唔見1格。再跌，則諗吓Call輪博反彈，正路對象係9839，10月初到期，輪價25.5仙，溢價4%，槓桿率15.3倍。冷門Call輪9428其實數據唔錯，10月中前到期，輪價57仙，溢價1.8%，槓桿率6.8倍，最弊係冇乜成交。
大唐發電（991）跌20仙，收6.45元，再低一啲，估計會有趁低吸納活動，吼低位收集Call輪，對象係9222，下月尾到期，輪價70仙，溢價2.0%，槓桿率9.2倍。
章盛