政府噚日喺禮賓府慶祝官債成功發行，財政司司長唐英年梗要致辭，佢話今次發債成績令人非常滿意，政府發行二百億元債券，接獲認購金額五百七十八億元，係認購總額二點九倍，即係超額一點九倍。咁好成績，晒吓命本來無可厚非，但噚晚政府新聞處發嘅財爺中英文講稿，都唔見有上面提到嘅認購金額同埋倍數。
原來，根據美國證監會規例，喺美國招售嘅證券或者債券，唔可以提超額倍數同總認購額等含有宣傳推廣成份數字，所以港美兩地上市嘅股票，例如中國人壽，公布股份配售分配時，都只係話獲得大幅超額認購，冇提實際數字。今次唐司長噏多咗，雖然佢講嘅係總數，唔係淨講美國部份，但聰明嘅讀者將總數減咗港元認購部份，亦可計到美國個數。不過新聞處都醒目，發嘅講稿英文版後面加上附註，講明份稿唔係作推廣之用，補番隻鑊。
（圖）好彩唐司長冇即場派講稿，如果唔係白紙黑字重衰多啲。
傳真︰2623-9278
電郵︰