老虎仔的遠東發展（035）真係唔講得笑，繼上周公布全年業績由虧轉盈，賺成1.49億銀後，旋即又以快槍手姿態，以4.7億元出售旺角物業，勁賺2億幾銀，然後又以1.18億銀收購荷李活道物業，近排真係夠晒活躍。
遠展在公布完物業買賣後，噚日復牌，股價逆市勁升10.7%，並以全日最高價1.66元收市，成交股數3129萬股，金額5047萬元。
經紀黃話，除咗本地物業市場外，傳聞遠展重有其他大計，其中一項就係進軍濠江搞酒店。遠展在本港經營三星級酒店已有一段日子，今次進軍濠江，暫時唔知會點，但近年來人人都談論濠江賭壇新局面，遠展過去發展唔係冇道理。
另外，靜咗一輪嘅泳衣股德發集團（928），將在7月26日公布全年業績，股價近排亦做番好啲，升回0.70元水平。噚日德發又升4.3%，收0.73元。
經紀黃話，估計德發全年盈利應有增長，但聽講唔係正到嚇你一跳嗰種，所以唔好有過大期望。
慕容小初