才子陶傑同歌手李逸朗噚日出席書展「城邦十大好書」捐贈儀式，Tom集團捐咗二千本城邦嘅書畀啟勵扶青會，而佢兩位就同大家分享一下睇書嘅心得。現場所見，陶傑原來有唔少𡃁妹fans，好多妹妹圍住佢攞簽名同合照。陶傑話自己細個嘅時候，唔讀書但鍾意睇書，佢又用娶老婆比喻讀書，一夜情去比喻睇書。
陶傑話揀書睇就好似男人揀女人咁，佢就着重外在美，要樣靚身材好，又話自己「好濫交，見到就想摸吓搞吓」，重鼓勵大家同佢一樣咁濫交，因為睇得書多可以皮光肉滑，雙眼都大啲，行出嚟人都有自信啲，而且重可以培養尊嚴、提升寫作能力、吸收別人嘅智慧同埋學到點同人溝通！才子寫嘢咁叻，佢講嘢大家當然要聽啦！
同場嘅李逸朗都話自己因為睇得書多，雖然二十二歲但已有二十五歲嘅智慧，睇書可以提高自己嘅人生經驗，兼且令佢有自信，對佢嘅演藝事業都有幫助。
（圖）陶傑（右）去書展，有好多女fans圍住佢攞簽名同合照。
傳真︰2623-9278
電郵︰