陳太先嗰輪喺《時代》周刊用英文講咗一句：「信任我們」，支持○七、○八普選，即時遭到中方圍攻狂插，糟躓完一輪之後，表現果然有少少「進步」。
陳太評論政治，最新立場，係轉型行「客觀中立」路線，做咗和事老。佢話喺市民眼中，某啲政黨懷有「野心」、心存「偏見」，咁又唔怪得中央對佢哋嘅用心同動機有顧慮喎。
從政邊個冇野心？有野心係咪犯咗罪？陳太本人又有冇野心？土共就一口咬定佢有，話佢想做特首。𠵱家陳太唔留喺屋企相夫教孫，成日評論時政，又唔知有乜用心及動機，唔怪得俾老左得閒就執佢幾劑。
陳太又話，某啲政黨「心存偏見」。有時對某一件事，立場分明，就叫做偏見？沙士受難人家屬大罵楊永強「厚顏無恥」，唔知又算唔算對楊局長有偏見，乜陳太呢幾年咁多評論，唔知係佢自己對國家及阿董有偏見，定係土共對佢有偏見，定係全世界都有偏見，淨係佢自己冇偏見？
跟住陳太又叫政黨生吓性，令到政黨政治快啲成熟。原來香港啲政黨有野心、有偏見，又未成熟，咁陳太又點解喺《時代》周刊拍心口，叫中方「信任我們」（trustus）？好彩中方當時冇聽陳太亂咁點，冇信任香港嘅政黨，批准你班嘢○七、○八普選，原來𠵱家陳太先至話政黨係未夠成熟嘅，可見否決普選，中央真係好高瞻遠矚。
既然組織政黨，有野心，天公地道，正如一個打工仔想升職，想有朝一日入董事局，呢啲係有野心，定係有抱負？反而現時嘅民主派，就算有野心都冇用，因為根本冇可能執到政。陳太對政治嘅認識，若然係咁嘅水準，好彩○七年冇普選特首，因為陳太到時報名，香港人都唔知選出嗰個係乜水。
現時一個亂局，冇經過大腦消化過嘅，就唔好亂，一講錯就會扣晒分。對於陳太